年年月月日日時時分分秒秒有你有我

我心情唔好，好嬲個世界。我忽爾好嬲個世界，好極端咁講，除左佢。同時今日是我這位another half生辰，我手指都唔使數就知道，對上一次見，已經好似once upon a time之前。我用極都係呢張相，因為我地已經七年無合照。七年。我七年無見過呢個我生命中最重要的伴，對上一次已是隆冬的柏林，而七年之前，我地在同一個國家讀書，但分隔兩地，可以話，自18歲之後，我地就無一齊生活過。

七年前在柏林，佢在我地有次回程地鐵車廂中同我講過既說話，我仲猶新，類似係，「我地好安全的，我地兩個一起的，你其實唔使驚，你可以試吓的」，咁樣。

七年之內，我試左好多野。個日我喺維園，後面兩個女人話，「我地係黎體驗呢個人生的。」我在前方點了點頭。我地唔喺對方身邊既呢咁多年，我地嘗試咗好多個自己，好多個version、好多個版本的自己。呢一路上，佢都陪住我，我都陪住佢。我曾經因為佢，我覺得要生存落去。佢救左我一次又一次。我地用盡可能的方式陪，或者，咩都唔使做，我（佢）都完全感受到佢（我）既陪伴。

我地黎呢個世界係要體驗人生的。我頭先同佢講，我當然祝福佢有好的健康、心境、進步、快樂、幸福。但同時我想抹走哂佢地，因為祝福，基本上係，一言難盡。世界係萬花筒般fluid，美事與壞事都無盡頭，一旦生存都有可能有變數，我無法single out這些祝福。我只想祝福佢有完整的生活與生命。我祝福佢一切。一切我所能給予的。願你在人生帶你體驗的所有地方當中，有堅定的心面對高低跌宕。而我會陪你。

總而言之的話，就是，佢好即係我好，反之亦然。我好即係佢好。必然的，無野可以更加堅定。

我唔識講，唔識寫——但如果你心目中有「這麼的一雙我倆」，你就知道，這份愛與牽繫，可以話係大到唔識講。大到我個腦宜家起諗都hang機。

我地兩個三歲一齊跳繩。某程度上，自三歲之後，我地都一齊在跳繩。揮著繩帶搖著時，我會看準時機與節奏，進入你的生命。反之亦然。

願你生日快樂。年年月月日日時時分分秒秒有你有我。